أريد أفوق

كلمات اغنية أريد أفوق أحلام

أريد أبوح أريد أحكي إذا ما في الحكي مانع
تعبت اكتم ضجيج الحزن بين اضلوعي وابكيه

كرهت العمر لي يمضي بلا غاية ولا دافع
ابي اكسر قيود الأمس وأنسى هالعبث وانهيه

اساي اللي كتبها الوقت بحبر دموع ومواجع
ترك هاليل يذبحني وشمسي عاجزه تطفيه

يسابقني خيال الضعف ويبعدني عن الواقع
وانا والصمت نتحسر ولا نرضى بما يقضيه

أريد أفوق من لحظة خيالي واسبق الواقع
أنا مليت من هذا الخيال اللي سكنا فيه

وليه اضعف واستسلم واغيب بهالفضاء الواسع
تعبت أغيب أحلامي واداري هالأسى واخفيه

اعيش بعالمٍ قاسي ولا يقطع بهم قاطع
كفاني ليه اضحك له واحاول دايمٍ ارضيه

وانا والجرح ما عشنا حياة فراق وموادع
خلقنا من سيوف الصد ليدين الوجع والتيه

احس ان الأمل موجود نجمه فالسماء ساطع
أناظر فيه وعيوني ترده لي وتغرق فيه

ولو بيني وبين الحلم مسافة وفارقٍ شاسع
يكفيني اعيش الحلم واحرق هالإسى وامحيه