كلمات أغنية نصين الفولة

إزاي نصين الفولة إتقابلوا بعد سنين
إزاي مكانوش فاكرين
وإزاي فرطوا النصين
معقول بعد ما يتقاسموا
توصل بيهم يتقسموا
عن بعض ياعيني تايهين

ماهو لما الفولة إتقسمت
تاه نص وساب التاني
يسرح في الكون وحداني
وغريب عن نصه التاني
روح وإتقسمت نصين

دارت دنيتهم لفت
والصدفة دي تجمع تاني
الساعة تعد ثواني
فا يعدوا هم سنين
والقصة بقت مقفولة
إزاي نصين الفولة إتقابلوا بعد سنين

حاولوا يلاقوا شبه اللي ضاع منهم مش لاقيين
لفوا زي ما لفوا وعلى غير بعض مش لايقين
حاولوا ومش حاسين جربوا مش عارفين
ما اللي لاقوه وشافوه من بعض
ده لأ مش في التانيين

دارت دنيتهم لفت
والصدفة دي تجمع تاني
الساعة تعد ثواني
فا يعدوا هم سنين
و القصة بقت مقفولة
إزاي نصين الفولة اتقابلوا بعد سنين